"Ebu Hureýreden (Allah ondan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellem iň soňky rukugdan başyny galdyryp şeýle diýerdi : “Allahym! ‘Aýýaş ibn Ebu Rabi’any halas et! Allahym! Selemete ibn Hişami halas et! Allahym! Welid ibn Welidi halas et! Allahym! Güýçsiz-kuwwatsyz, beýleki ejiz mu’minleri halas et! Allahym! Mudar tiresine has beter azap ber, olaryň ýaşan bu ýyllaryny Yusup aleýhissalamyň gytlyk ýyllaryna meňzet!”.
Ýene-de Pygamberimiz sallallahu aleýhi wesellem şeýle diýipdi: “Allah Gifar taýpasyny bagyşlasyn, Eslem taýpasyny hem halas etsin!”.
Ibn Ebuz-Zinad öz kakasyndan rowaýat etmegine görä, ol şeýle diýipdir: “Pygamberimiz sallallahu aleýhi wesellem bu dogalaryň hemmesini ertir namazynda edipdir”.
"
“• Pygamberimiz sallallahu aleýhi wesellem bu dogany hemişe etmändir, belli bir wagt aralygynda kunut dogasynda edipdir.
• Bu ady agzalan sahabalar müşrükleriň elinde ýesirlikde galan sahabalardyr.
• Şol döwürde Mudar tiresiniň gündogar tarapdaky bölegi Pygamberimiz sallallahu aleýhi wesellem garşy çykypdyr.
• Ertir namazynyň iň soňky rukugundan başyny galdyrandan soň ellerini galdyryp şeýle doga edipdir.
”
"Abdulla ibn Mes‘uddan (Allah ondan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellem adamlaryň (Yslamy kabul etmekden) ýüz öwürendiklerini görende: “Allahym! Olara Yusuf (aleýhissalamyň) döwründäki ýedi (guraklyk ýylyna) meňzeş ýedi (guraklyk ýyly) iber!” diýip dileg etdi”.
Şondan soň şeýle bir (gytlyk, guraklyk) ýyl boldy welin, ähli (ösümlikler kökünden gurap) ýitip gitdi. Adamlar haýwanlaryň derisini, maslyk, porsy etleri iýip başladylar. Hatda, olardan biri gözüni asmana galdyryp seredende, (açlykdan ýaňa asman) oňa tüsse ýaly bolup görünerdi.
Soňra Ebu Sufýan Pygamberimiz sallallahu aleýhi wesellemiň ýanyna gelip: “Eý, Muhammed! Sen adamlara Allaha boýun bolmagy we garyndaşlar bilen gatnaşygy saklamagy buýurýarsyň, seniň kowumyň heläk bolup barýar, Allahdan olar üçin doga-dileg edip beräý!” diýdi. Allah Tagala şu aýatlary inderdi:
“Indi, sen asmandan äşgär ýagdaýda geljek tüsseli güne garaş. (Ol tüsse) ynsanlary gaplap alar. Bu juda ýowuz azapdyr. (Şol wagt ynsanlar): “Eý, Perwerdigärimiz! Bu azaby bizden aýyr! Takyk, biz indi ynanýarys” diýerler. Olar nädip öwüt-ündew alsynlar? (Ýogsa) olara (hakykaty beýan edýän) hak ilçi hem gelipdi. Soň ondan (pygamberden) ýüz öwürdiler hem-de ol (Allaha şärik goşanlar): Bu (Jyn tarapyndan) sapak berlen mejnundyr (jyndyr)” diýdiler. Takyk, Biz azaby sähel hem bolsa aýrarys, ýöne siz (ýene-de öňki ýagdaýyňyza, kapyrlygyňyza) dolanyp bararsyňyz. Biz örän uly zarba urjak (kyýamat) günümizde, elbetde, arymyzy alarys”. {Duhan:10-16}.
(Ibn Mes‘ud): “Bu zarba Bedr günidir. Tüsse, zarba, lizam, şeýle hem Rumlylar hakyndaky aýat, bularyň hemmesi bolup geçendir” diýdi.
"
“• Kureýişlili müşrikler.
• Bu ýerde Ibn Mnes‘ud Taha süresiniň 129-nji aýatyndaky aýdylan günälere beriljek jezalar belli bir wagta (Kyýamat gününe) çenli süýşürilýändigini, ýogsam şol bada berilerdi diýjek bolýar.
”
"Abdurrahman ibn Abdulla kakasy Abdulla ibn Dinardan habar bermegine görä, ol şeýle diýipdir: Men Abdulla ibn Omaryň mysal hökmünde Ebu Talybyň şu goşgusyny okanyny eşitdim:
“Ol şeýle bir akdyr, ýüzüniň hormatyna bulutdan ýagmyr soralar
Ol ýetimleriň howandary, dullaryň bolsa hossarydyr...”
"
"Abdulla Ibn Omardan (Allah olardan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellemiň ýagmyr ýagmagy üçin doga eden wagtlary, entek münberden düşmänkä, ternawlardan suwyň dolup şyr-şyr edip akyp duruşyny görenimde, Pygamberimiz sallallahu aleýhi wesellemiň (mübärek) ýüzüne seredip, şahyryň:
“Ol şeýle bir akdyr, ýüzüniň hormatyna bulutdan ýagmyr soralar
Ol ýetimleriň howandary, dullaryň hem hossarydyr...”
diýen sözlerini ýadyma salardym”.
"
"Enes ibn Mälikden rowaýat edilmegine görä, gurakçylyk ýüze çykan döwürlerinde, Omar ibn Hatab (Alla ondan razy bolsun) Abbas ibn Abdulmuttalyba ýagyşyň ýagmagyny Allahdan diläp bermegini haýyş ederdi we ol:
“Allahym! Biz hemişe ýagyş ýagmagy üçin pygamberimize dileg etdirerdik, Senem bize ýagyş ýagdyrardyň. Indem bolsa, pygamberimiziň agasyndan Saňa dileg edip bermegini soraýarys, (Allahym!) bize ýagmyr ýagdyr!” diýip dileg ederdi”. Şondan soň hakykatdanam ýagyş ýagardy.
"
Abdulla ibn Zeýtden rowaýat edilmegine görä, bir gezek Pygamberimiz sallallahu aleýhi wesellem ýagmyr ýagmagy üçin dileg etdi we donuny ters ýüzüne çöwürdi”.
Abdulla ibn Zeýtden rowaýat edilmegine görä, Pygamberimiz sallallahu aleýhi wesellem namaz okalýan ýere gelip, ýagmyr ýagmagy üçin dileg etdi. (Soňra) kybla tarap ýüzlenip, donuny ters ýüzüne çöwürip, iki rekagat namaz okady”.
"Enes ibn Mälikden (Allah ondan razy bolsun) rowaýat edilmegine görä, ol şeýle diýipdir: “(Bir gün) Pygamberimiz sallallahu aleýhi wesellem juma güni dik durup hutba okap durka bir adam münberiň garşysynda ýerleşýän bir gapydan mesjide girdi. Ol adam Resulullah sallallahu aleýhi wesellemiň öňünde durup, dik duran ýerinden: “Ýa Resulallah! Mallarymyz gyryldy, ýollarymyz kesildi, hiç ýere gidip bilemizok, Allahdan ýagyş ýagar ýaly dileg edip beräýdä!” diýdi.
Resulullah sallallahu aleýhi wesellem ellerini asmana göterip şeýle diýdi: “Allahummä-skynä! Allahummä-skynä! Allahummä-skynä!” (Allahym! Bize ýagmyr ýagdyr! Allahym! Bize ýagmyr ýagdyr! Allahym! Bize ýagmyr ýagdyr!).
Enes şeýle diýdi: “Allahdan ant içýärin, şol wagt asmanda ýekeje-de bulut, hatda, hiç zat hem ýokdy, biziň bilen Salg dagynyň arasynda hiç bir bina ýa-da jaý ýokdy” diýdi.
Ýene Enes şeýle diýdi: “Birden dagyň arka tarapyndan galkan şekilli bir bulut peýda boldy we asmanyň ortarasyna gelip, (hemme tarapa) ýaýrap gitdi. Soňra bolsa ýagyş ýagdy.
Enes şeýle diýdi: “Allahdan ant içýärin, şondan soň alty günläp gün görmedik. Allahyň Resuly indiki juma güni dik duran ýerinden hutba okap durka, şol bir gapydan bir adam girip, onuň garşysyna geçip, dik duran ýerinden: “Eý, Allahyň Resuly, hemme zadymyz weýran boldy, ýollardan geçer ýaly bolmady, ýagyş dynar ýaly Allahdan dileg edip beräýdä!” diýdi.
Enes şeýle diýdi: “Soňra Resulullah sallallahu aleýhi wesellem ellerini asmana göterip: “Allahym! Üstümize däl-de, töweregimize ýagdyr! Allahym depelere, daglara, belentliklere, jülgelere we agaçlaryň ösýän ýerlerine ýagdyr!” diýip doga etdi.
Enes: “Ýagyş şol bada kesildi. Daşary çykanymyzda gün eýýäm şöhle saçyp durdy” diýdi.
Men Enes ibn Mälikden: “Ikinji juma güni gelen adamam, şol bir adamdymy? diýip soradym. Ol: “Bilmedim” diýdi.
"
"Enes ibn Mälikden (Allah ondan razy bolsun) rowaýat edilmegine görä, ol şeýle diýipdir: “(Bir gün) Pygamberimiz sallallahu aleýhi wesellem juma güni dik durup hutba okap durka bir adam “Darul-Kada” tarapda ýerleşýän bir gapydan mesjide girdi. Ol adam Resulullah sallallahu aleýhi wesellemiň öňünde durup, dik duran ýerinden: “Ýa Resulallah! Mallarymyz gyryldy, ýollarymyz kesildi, hiç ýere gidip bilemizok, Allahdan ýagyş ýagar ýaly dileg edip beräýdä!” diýdi.
Resulullah sallallahu aleýhi wesellem ellerini asmana göterip şeýle doga etdi: “Allahummä agisnä! Allahummä agisnä! Allahummä agisnä!” (Allahym! Bize ýagmyr ýagdyr! Allahym! Bize ýagmyr ýagdyr! Allahym! Bize ýagmyr ýagdyr!).
Enes şeýle diýdi: “Allahdan ant içýärin, şol wagt asmanda ýekeje-de bulut, hatda, hiç zat hem ýokdy. Biziň bilen Salg dagynyň aralygynda ne bir bina ne-de jaý, hiç zat ýokdy” diýdi.
Ýene Enes şeýle diýdi: “Birden şol dagyň arka tarapyndan galkan şekilli bir bulut peýda boldy we asmanyň ortarasyna gelip, (hemme tarapa) ýaýrap gitdi. Soňra bolsa ýagyş ýagdy.
Enes: “Allahdan ant içýärin, biz alty günläp gün görmedik. Resulullah sallallahu aleýhi wesellem indiki juma güni dik duran ýerinden hutba okap durka, şol bir gapydan bir adam girip, onuň garşysyna geçip, dik duran ýerinden: “Eý, Allahyň Resuly, hemme zadymyz weýran boldy, ýollardan geçer ýaly bolmady, ýagyş dynar ýaly Allahdan dileg edip beräýdä!” diýdi.
Enes: “Soňra Resulullah sallallahu aleýhi wesellem ellerini asmana göterip: “Allahym! Üstümize däl-de, töweregimize ýagdyr! Allahym depelere, baýyrlara, dereleriň içine we agaçlaryň ösýän ýerlerine ýagdyr!” diýip doga etdi.
Enes: “Ýagyş derrew kesildi. Biz daşary çykanymyzda, eýýäm günüň aşagynda ýöredik” diýdi.
Şerik men Enes ibn Mälikden: “Başda gelen adamam şol bir adamdymy? diýip soradym. Ol: “Bilmedim” diýdi.
"
"Enesden (Allah ondan razy bolsun) rowaýat edilmegine görä, ol şeýle diýipdir: “Bir gezek Pygamberimiz sallallahu aleýhi wesellem Juma güni hutba okap durka, bir adam gelip: “Eý, Allahyň Resuly! Bize guraklyk geldi, Allahdan ýagyş ýagdyrmagy üçin doga edip beräýdä!” diýdi. Pygamberimiz sallallahu aleýhi wesellem hem doga etdi we şeýle bir ýagyş ýagyp başlady welin, zordan öýlerimize baryp ýetdik we indiki juma gününe çenli dowam etdi”.
Enes şeýle diýdi: “Soňra şol bir ýa-da başga bir adam ýerinden turdy-da: “Eý, Allahyň Resuly, ýagyş üstümize ýagmaz ýaly Allahdan diläp bersene!” diýdi. Soňra Allahyň Resuly sallallahu aleýhi wesellem: “Allahym, üstümize däl-de, töweregimize ýagdyr!” diýdi.
Enes şeýle diýdi: “Bulutlaryň saga we çepe dargap gidşini gördüm, ýagyş ýagýardy, ýöne Medinäniň üstünde ýagmaýardy”.
"
