Abdulla ibn Omardan (Allah olardan razy bolsun) rowaýat edilmegine görä, ol şeýle diýipdir: “Men Allahyň Resuly sallallahu aleýhi wesellem bilen bilelikde Nejd tarapa söweşe gidipdim. Duşman bilen gabatlaşanymyzda, olaryň öňünde hatara düzüldik. (Namazyň wagty girende) Allahyň Resuly sallallahu aleýhi wesellem bize namaz okap bermek üçin namaza durdy. Bir topar sahabalar hem onuň bilen bilelikde namaza durdy. Sahabalaryň beýleki topary bolsa, duşmana tarap öwrülip durdy. Allahyň Resuly sallallahu aleýhi wesellem öz ýanyndakylar bilen bilelikde rukuga bardy we iki gezek sejde etdi. Soňra onuň bilen birlikde namaz okanlar heniz okamadyk toparyň duran ýerine tarap bardylar. Soňra olar hem gelip, Pygamberimiz sallallahu aleýhi wesellemiň yzynda durdylar. Allahyň Resuly sallallahu aleýhi wesellem olar bilen rukuga baryp, iki gezek sejde etdi. Soňra (egnine) salam berdi. Soňra ol iki toparyň her biri ýerinden turup, özbaşdak bir gezek rukug we iki gezek sejde etdiler”.
