"Ibn Abbasdan (Allah ondan razy bolsun) rowaýat edilmegine görä, ol şeýle diýipdir: “Bir gezek bir adam ondan: “Pygamberimiz sallallahu aleýhi wesellem bilen (baýram namazyna) bile çykyp gördüňmi?” diýip sorady. Ibn Abbas: “Hawa, eger-de men Oňa ýakyn (garyndaş) bolmadyk bolsadym, onda men ol ýerlerde bolmazdym” diýdi. Ýagny, ýaşynyň kiçiligini göz öňüne tutup aýtdy.
Pygamberimiz sallallahu aleýhi wesellem Käsir ibn Saltyň öýüniň deňindäki sütüniň ýanyna geldi. Soňra şol ýerde adamlara hutba okady. Soňra aýallaryň ýanyna baryp, olara-da öwüt-nesihat etdi, olara köp zatlary ýatlatdy we sadaka bermeklerini emr etdi. Aýallar monjuklaryny aýyrmak üçin ellerini boýunlaryna uzadyp, olary Bilalyň eşiginiň üstüne zyňyp başladylar. Soňra bolsa Pygamberimiz sallallahu aleýhi wesellem Bilal bilen birlikde öýe gaýtdylar”.
"
