"Ebu Hureýreden (Allah ondan razy bolsun) rowaýat edilmegine görä, ol şeýle diýipdir: (Bir gezek) Pygamberimiz sallallahu aleýhi wesellemiň ýanyna garyp sahabalar gelip: “Ýa Resulallah, baýlar belent derejelere eýe bolup, (Jennetdäki) ebedi nygmatlara gowşarlar. Olar biz ýaly namaz okaýarlar, biz ýaly agyzlaryny bekleýärler. Ondan başga-da, olaryň özlerinden artyk baýlyklary bolup, şol baýlyklarynyň arkasyndan haja gidýärler, umra hajyny edýärler. Allah ýolunda jihäd edýärler, sadaka berýärler” diýip, Oňa ýüzlendiler.
Pygamberimiz sallallahu aleýhi wesellem: “Size bir zady habar bereýinmi? Siz şu aýdanymy etseňiz, sizden öňdäkileriň yzyndan ýetersiňiz we sizden soňkularyň hiç biri hem tä, olar hem siziň edişiňiz ýaly edýänçäler siziň yzyňyzdan ýetip bilmezler. Şeýdip aralarynda ýaşap ýörenleriňiziň içinde iň haýyrly ymmat siz bolarsyňyz. Her gezek parz namazyny okap bolanyňyzdan soňra otuz üç gezekden “Subhanallah”, “Älhamdulilläh”, “Allahu Akbär”, diýiň” diýdi.
Bu hadysy rowaýat eden adam şeýle diýdi: “Biziň aramyzda jedel ýüze çykdy. Käbirlerimiz: “Biz otuz üç gezek “Subhanallah”, otuz üç gezek “Älhamdulilläh”, otuz dört gezek hem “Allahu Akbär” diýmeli diýdi. Şonda men (muny soramak) üçin gaýtadan (Pygamberimiz sallallahu aleýhi wesellemiň) ýanyna bardym. Ol maňa: “Subhanallah”, “Allahu Akbär”, “Älhamdulilläh” diýip, hersini otuz üç gezek bolýança aýt” diýdi.
"
