"Enes ibn Mälikden (Allah ondan razy bolsun) rowaýat edilmegine görä, ol şeýle diýipdir: “Bir gezek Resulullah sallallahu aleýhi wesellem atly barýarka atdan ýykylyp, sag tarapyny sypjyrdypdyr. Ol namazlardan (haýsam bolsa) birini oturyp okady. Biz hem onuň yzynda (oňa uýup) oturup okadyk. Namazyny okap bolandan soň: “Elbetde, ymam diňe oňa uýmak üçin bellenýändir. Eger (ymam) dik durup namaz okasa, siz hem dik durup namaz okaň. Eger (ymam) rukuga egilse, siz hem egliň; başyny galdyranda, siz hem galdyryň. “Sämi’allahu limän hämidäh” diýen wagty siz: “Robbänä wä läkäl-hämd” diýiň. Eger-de (ymam) dik durup namaz okasa, onda siz hem dik durup namaz okaň. Eger oturan ýerinden namaz okasa, siz hem hemmäňiz, oturyp namaz okaň” diýdi. Ebu Abdulla (Buharynyň) aýtmagyna görä, El-Humeýdi şeýle diýipdir: “(Pygamberimiz sallallahu aleýhi wesellemiň) eger-de ymam oturyp namaz okasa, siz hem oturyp namaz okaň!” diýen sözi, has ir syrkaw wagtlarynda aýdan sözüdir. Şondan soň Pygamberimiz sallallahu aleýhi wesellem (bir gezek) oturyp namaz okady, yzyndaky adamlar bolsa, dik durup namaz okadylar. Emma şol wagt Pygamberimiz sallallahu aleýhi wesellem olara oturmagy buýurmady. Şonuň üçin hem Pygamberimiz sallallahu aleýhi wesellemiň eden işleriniň içinden iň soňkusyny almalydyr”. "