"Ibn Abbas (Allah ondan razy bolsun) şeýle diýipdir: “(Bir) gije Allahyň Resuly sallallahu aleýhi wesellem ýassy namazyny şeýle bir gijikdirdi welin, hatda adamlar uklap galdylar. Soň oýandylar, soň ýene ukladylar, soňra ýene oýandylar. Şondan soň Omar (ibn Hattab) ýerinden turup: “Namaz!” diýip seslendi”. ‘Ata, Ibn Abbas ýene-de şeýle diýip aýtdy diýdi: “Pygamberimiz sallallahu aleýhi wesellemiň kellesinden suw damyp duran halynda, ellerini kellesinde goýup (öýünden) daşaryk çykyşy häzirem gözümiň öňünden gidenok. Ol öýünden (çykandan soň) bize ýüzlenip: “Eger-de men ymmatyma kynçylyk döretmedik bolsadym, onda olara bu namazy şeýle okamaklaryny emr ederdim” diýdi. Ibn Jureýj şeýle diýdi: “Men ‘Atadan Pygamberimiz sallallahu aleýhi wesellemiň elini kellesinde nädip goýşuny, Ibn Abbasyň habar berşi ýaly, anyk suratlandyryp görkezmegini haýyş etdim. ‘Ata barmaklarynyň arasyny biraz açdy, soňra barmaklarynyň uçlaryny depesinde goýdy. Soňra olary kellesiniň üstünde gezdirip barmaklaryny birleşdirdi. Başam barmagyny ýüz tarapyndan gulak ýumşaklygyna degýänçä, (ýokardan aşaklygyna) maňlaý we sakgal taraplaryna indirdi. Ol muny edende ne haýal, ne-de çalt edip görkezdi” diýdi. "