". Abdulla ibn Omardan (Allah olardan razy bolsun) rowaýat edilmegine görä, ol Pygamberimiz sallallahu aleýhi wesellemiň şeýle diýendigini eşidipdir: “Hakykatdan hem sizden öňki geçen ymmatlaryňky bilen deňeşdireniňde, siziň dünýäde galmaly wagtyňyzyň uzaklygy ikindi namazyndan Gün ýaşýança geçen wagtyň uzaklygy ýalydyr. (Wagtynda) Töwrat ähline (ýagny Töwrat inen halka) Töwrat berildi. Olar günortana çenli şonuň görkezmeleri bilen amal edip, soňra ejizlediler. Olara günlük bir kyratdan (sylag) berildi. Soňra Injil ähline Injil berildi. Olar ikindi namazyna çenli şonuň görkezmeleri bilen amal edip, soňra olar hem ejizlediler. Olara-da günlük bir kiratdan (sylag) berildi. Soňra bize Kuran berildi. Biz (onuň bilen) Gün ýaşýança amal etdik. Bize (günlük sylag hökmünde) iki kyratdan berildi. Soňra iki Kitap ähli (Allaha ýüzlenip): “Eý Robbumyz! Biz bulardan has köp (amal edip) işlänem bolsak, bulara iki kyratdan, bize-de bir kyratdan berdiň!” diýerler. Gudraty güýçli we Beýik Allah olardan “Siziň hakyňyzdan bir zat kemäp, size zulum etdimi?” diýip sorar. Olar “Ýok” diýip jogap bererler. Şonda Allah Tagala olara: “Ine, şol Meniň fazly-keremimdir. Ony bolsa Men islänime eçilerin!” diýer. "