"Bara (ibn ‘Azybdan Allah ondan razy bolsun) rowaýat edilmegine görä, ol şeýle diýipdir: “(Oraza tutmak ilki parz edilen döwürleri) Muhammed sallallahu aleýhi wesellemiň sahabalaryndan biri agyz bekläp, agyz açmaly wagty gelende, agzyny açman uklap galsa, ol adam şol gije we tutuş (ertesi) gün agşama çenli hiç zat iýmezdi.
(Bir gün) Ensarylardan Kaýs ibn Syrma (atly bir sahaba) agzyny bekledi, agyz açmaly wagty gelende aýalynyň ýanyna gelip: “Iýer ýaly naharyňyz barmy?” diýip sorady.
Aýaly: Ýok, ýöne gidip, seniň üçin bir zatlar gözlärin!” diýdi. Kaýs şol gün uzakly gün işläpdi. Şonuň üçinem ukusyna döz gelip bilmän (ýatyp galdy). Birnäçe wagtdan soň aýaly onuň ýanyna gelip, onuň uklap galandygyny görüp: “Wah, nesibäňde ýok eken-dä!” diýdi. Ertesi gün günortan çagy Kaýs özünden gidip ýykyldy. Muny Pygamberimiz sallallahu aleýhi weselleme habar berdiler. Şondan soň hem şu aýat indi: “Size oraza gijelerinde aýallaryňyza ýanaşmak halal edildi. Olar siziň lybasyňyzdyr (örtügiňizdir), siz hem olar üçin lybassyňyz. Allah siziň özüňize erbetlik edýändigiňizi bildi we tobaňyzy kabul edip, siziň (günäleriňizi) bagyşlady. (Siz) indi (oraza gijelerinde) olara (aýallaryňyza) ýanaşyp (bilersiňiz) we Allahyň siziň üçin ýazgyt eden zadyny (perzent edinmegi) gözläň!” {Bakara:187}.
Sahabalar muňa gaty begendiler, soň bolsa şu aşakdaky aýat indi: “Säher çagy, tä siziň üçin ak sapak gara sapakdan saýgarylýança, iýiň we içiň!” {Bakara:187}."
