"Ebu Katada şeýle habar berdi: “Pygamberimiz sallallahu aleýhi wesellem haj etmek üçin (Medineden) ýola çykdy. Sahabalar hem onuň bilen bile çykdylar. Pygamberimiz sallallahu aleýhi wesellem sahabalaryň bir toparyny (başga bir tarapa) öwürdi. Olaryň içinde Ebu Katada-da bardy we olara şeýle diýdi: “Siz tä, bize duşýançaňyz, deňiziň kenary bilen geliberiň” diýdi. Olar hem deňiz kenary bilen ýöräp gaýtdylar. Pygamberimiz sallallahu aleýhi wesellemiň ýanyndan çykyp gaýdanlaryndan soň, Ebu Katadadan galan hemmesi yhram bagladylar, diňe ol yhram baglamady. Olar gidip barýarkalar, bir ýabany eşek sürüsine gabat geldiler. Ebu Katada olaryň üstüne hüjüm edip, bir urkaçy eşegi urup öldürdi. Olaryň hemmesi düşüp, onuň etinden iýdiler. Soňra olar: “Biz yhramly halymyzda aw etini iýip bilerismi?” diýdiler. Soňra ýabany eşegiň galan etini ýanymyz bilen alyp gaýtdyk.
Pygamberimiz sallallahu aleýhi wesellemiň ýanyna gelenlerinde olar: “Ýa Resulallah! Biz yhram bagladyk, Ebu Katada bolsa baglamady. Ýolda bir süri ýabany eşeklere gabat geldik. Ebu Katada olaryň üstüne hüjüm edip, bir urkaçy eşegi urup öldürdi. Biz hem düşüp, onuň etinden iýdik. Soňra öz-özümize: “Biz yhramly halymyzda aw etini iýip bilerismi?” diýişdik. Galan etini bolsa ýanymyz bilen alyp gaýtdyk” diýdiler.
Pygamberimiz sallallahu aleýhi wesellem: “Sizden biri (Ebu Katada) oňa hüjüm etmegi emr etdimi ýa-da oňa yşarat edip, görkezdimi?” diýip sorady. Olar: “Ýok” diýdiler. Pygamberimiz sallallahu aleýhi wesellem: “Onda galan etini hem iýiberiň!” diýdi."
