"Ýa‘lä ibn Umeýýeden (Allah ondan razy bolsyn) rowaýat edilmegine görä, bir gün Pygamberimiz sallallahu aleýhi wesellem Ji‘ranada wagty, egnine hoşboý yslardan sepilen (ýa-da sary reňke boýalan) bir adam ýanyna gelip (Pygamberimiz sallallahu aleýhi weselleme): “Umra hajynda maňa näme etmegi emr edersiň?” diýip sorady.
Şol wagt hem Allah Tagala Pygamberimiz sallallahu aleýhi weselleme bir wahy iberdi we onuň üsti bir eşik bilen örtüldi. Men Pygamberimiz sallallahu aleýhi weselleme wahy iberilen pursadyny görmegi arzuw ederdim. Omar maňa: “Gel derrew, sen Pygamberimiz sallallahu aleýhi weselleme Allahyň wahy iberip duran pursatyny görmek isleýärdiňmi?” diýdi. Men: “Hawa” diýdi. Omar örtügiň bir tarapyny galdyrdy, men Onuň, düýäniň horruldysynyň sesine meňzeş bir ses çykaryp duranyny gördüm. (Haçanda wahy gutaryp) ýuwaş-ýuwaş özüne gelenden soň, Pygamberimiz sallallahu aleýhi wesellem: “Hany, şol umra barada soran adam nirede?” diýip sorady. (Onuň ýanyna bir adamy getirdiler. Pygamberimiz sallallahu aleýhi wesellem oňa): “Egniňdäki donuňy çykar we bedeniňdäki hoşboý yslaryň yzyny we sary yzlary ýuwup aýyr we haj eden wagtyň näme edýän bolsaň, umrada-da şonuň ýaly et!” diýdi."
