"‘Urwe şeýle diýdi: “(Bir gün) men Aişadan (Allah ondan razy bolsun): “Allah Tagalanyň: “Takyk, Safa bilen Merwe (depeleri) Allahyň goýan alamatlarydyr. Kim (Allahyň) öýüne haj we umra (zyýaratyny) etse, olaryň arasynda sa‘y etmekde günä ýokdur. Kim öz islegi bilen haýyrly iş etse, elbetde, Allah şükür edijidir (edilen amalyň sogabyny doly berýändir we) bilýändir.” {Bakara:158} diýen sözleri hakynda näme aýdyp bilersiň? diýip soradym. Wallahi, Safa-Merwe aralygynda sa‘y etmedik hiç bir adama günä bolmaz!” diýdim.
Aişa oňa: “Sen nähili erbet zat aýtdyň, ýegen!” diýdi. Eger-de seniň bu düşündirişiň ýaly bolmaly bolsady, onda: “Olaryň arasynda sa‘y (etmeklikde dälde) etmezlikde günä ýokdur” diýip gelerdi. Ýöne welin, bu aýatlar Ensarylar hakynda iberilipdi. Olar musulman bolmazlaryndan öň, Muşewwel diýilýän ýerde özleriniň ybadat edýän butlary bolan Manat Tagiýe üçin haj etmek isläp yhram baglanlarynda, Safa-Merwe aralygynda sa‘y etmek günä hasaplapdyrlar.
Olar musulman bolanlaryndan soň bu hakda Pygamberimiz sallallahu aleýhi wesellemden: “Ýa Resulallah! Biz elmydama Safa-Merwe aralygynda sa‘y etmekligi günä hasaplardyk” diýip soradylar. Şondan soň Gudratygüýçli Allah Tagala şu aýaty inderdi: “Elbet-de, Safa bilen Merwe Allahyň goýan alamatlarydyr...”. {Bakara:158}.
Soňra Aişa ýene-de şeýle diýdi: “Safa bilen Merwe aralygynda sa‘y etmegiň başlangyjyny Pygamberimiz sallallahu aleýhi wesellemiň özi goýupdy, ony hiç kimiň taşlamaga haky ýokdur”.
Soňra men muny Ebu Bekr ibn Abdurrahmana habar berdim. Ol şeýle diýdi: “Elbetde, (Aişanyň jahiliýýet döwründe Safa-Merwe aralygynda sa‘y etmek günä hasaplaýan bir toparyň bolandygyny habar bermegi) bu bir ylymdyr. Ýöne men muny eşitmändim.
Ýöne men birnäçe ylym eýeleriniň şeýle diýenlerini eşitdim. Aişanyň (Allah ondan razy bolsun) habar beren Manat üçin yhram baglan bu topardan başga ýene bir topar bardy. Bularyň hemmesi jahiliýýet döwründe Safa bilen Merwe aralygynda sa‘y ederdiler. Yslam dini gelenden soň, Allah Tagala Kuranda Käbä towaf etsinler diýip, Safa-Merwäni agzamadygy üçin olar: “Ýa Resulallah! Biz (öňden bäri) Safa-Merwe aralygynda sa‘y edip gelýärdik. Allah Tagala Käbä towaf etmek hakynda (aýat) inderdi, ýöne welin, Safa-Merwe aralygynda sa‘y etmegi agzamady. Eger, Safa-Merwe aralygynda sa‘y etsek bize günä bolarmy? diýip soradylar. Ine, şol wagt hem Allah Tagala: “Takyk, Safa bilen Merwe (depeleri) Allahyň goýan alamatlarydyr...” {Bakara:158} diýen aýatyny inderdi.
Ýene-de Ebu Bekr (ibn Abdurrahman) şeýle diýdi: “ Men bu aýatyň bu iki toparyň ikisi üçin hem ýagny, jahiliýýet döwründe Safa-Merwe aralygynda sa‘y etmegi günä hasaplaýanlar üçin hem-de (jahiliýýet döwründe-de) sa‘y edip Yslamda (musulman bolanlaryndan soň) Allah Tagalnyň (Kuranda) Käbä towaf etmekligi buýrup, Safa-Merwäni agzamandygy üçin olaryň arasynda sa‘y etmegi günä hasaplaýan topar üçinem inderildi, diýip eşitdim”.
Soňra Allah Tagala Käbä towaf ediň diýen aýatyndan (Haj:29) soň, Safa-Merwe aralygynda hem sa‘y etmegi agzap aýat inderdi. {Bakara:158}."
