"Näfi‘dan rowaýat edilmegine görä, Ibn Omar (Allah olardan razy bolsun) Hajjaj, Ibn Zubeýre hüjüm eden ýylynda haj etmek isledi. Ibn Omara: “Adamlaryň arasynda bir uruş bar, olar saňa haj etmekden böwet bolarlar öýdüp gorkýarys” diýdiler. Ibn Omar: “Allahyň pygamberinde siziň üçin gözel görelde bardyr” diýdi. “Menem Pygamberimiz sallallahu aleýhi wesellemiň edişi ýaly ederin. Men umra hajyny etmek üçin sizi şaýat tutýaryn” diýdi. Soňra ýola düşdi. Haçanda, Beýda diýilýän ýere baryp ýetende: “Haj bilen umranyň ýagdaýy bir zatdyr. Men haj bilen umrany bilelikde berjaý etjekdigime sizi şaýat tutýaryn” diýdi we ol Kudeýid diýilýän ýerden satyn alan malyny gurbanlyk höküminde alyp gitdi we ondan artdyrmady.
Gurbanlyk güni gelýänçä, malyny öldürmedi, yhramdan çykmady, saçynam gysgaltmady, syrdyrmadam. Gurbanlyk güni gelende gurbanlygyny öldürdi we saçyny syrdyrdy. Ibn Omar ilkinji towafy bilen (Ifada towafyny) edenden soň, hajyň we umraň towafy tamam boldy diýip, hasap etdi. Ol: “Resulullah sallallahu aleýhi wesellem hem edil şeýle etdi” diýdi."
