"Ebu Humeýd Sa‘ydydan rowaýat edilmegine görä, ol şeýle diýipdir: “Biz Pygamberimiz sallallahu aleýhi wesellem bilen bile Tebuk söweşine gatnaşdyk. Haçanda, Wadi El-Kura diýilýän (oba) baryp ýetenimizde, öz bagynda işläp ýören bir zenan maşgalany gördik. Pygamberimiz sallallahu aleýhi wesellem sahabalaryna ýüzlenip: “(Şu baglardaky hurmalaryň näçeräk hasyl berjegini) çak ediň?” diýdi. Pygamberimiz sallallahu aleýhi wesellemiň özi, takmynan on wask möçberinde hasyl getirip biler diýip, çak etdi. Soňra ol aýala ýüzlenip: “(Hasyl toplanyňda) näçe hurma çyksa hasaplap goý!” diýdi.
Haçanda biz Tebuga baryp ýetenimizde, Pygamberimiz sallallahu aleýhi wesellem sahabalaryna: “Şu gije güýçli ýel turar, şonuň üçin hiç kim ýerinden turmasyn, düýesi bar bolanlar, düýesini berk duşap goýsun” diýdi. Biz düýelerimizi duşadyk. (Hakykatdanam, şol gije) güýçli ýel turdy. Kimdir biri ýerinden turdy, ýel ony Taýý dagyna göterip alyp gitdi.
Aýla şäheriniň patyşasy Pygamberimiz sallallahu aleýhi weselleme bir ak gatyr bilen don sowgat etdi. Pygamberimiz sallallahu aleýhi wesellem hem oňa deňiz kenaryndaky şäherlerde (asudalygyň üpjün ediljegi hakyndaky şertnamany) ýazyp berdi.
Pygamberimiz sallallahu aleýhi wesellem (yza gaýdyşyn) Wadi El-Kura gelip ýetende, ol aýaldan: “Baglaryňdan näçeräk hasyl ýygnadyň?” diýip sorady. Ol aýal: Resulullah sallallahu aleýhi wesellemiň çak edişi ýaly, “On wask boldy” diýip jogap berdi.
Soňra Pygamberimiz sallallahu aleýhi wesellem: “Men Medinä howlugyp çaltyrak gitjek bolýan, kim meniň bilen (gitmek isleýän) bolsa howluksyn!” diýdi.
Haçanda, Pygamberimiz sallallahu aleýhi wesellem (uzakdan) Medinäni görende: “Hana, Taaba!” diýdi. Uhud dagyny görende: “Bu dagjagaz bizi söýýär, biz hem ony söýýäris!” diýdi. Soňra ol: “Men size iň gowy ýerlerde ýaşaýan Ensarylaryň kimdigini habar bereýinmi!” diýdi. Olar: “Howa” diýdiler. Pygamberimiz sallallahu aleýhi wesellem: “Benu Nejjar (ogullarynyň) ýurdy, soňra Benu ‘Abdul- Aşhal taýpasynyň ýurdy, soňra Benu Sa ‘ida ýa-da Benu Haris ibn Al-Hazraj taýpasynyň ýurdydyr. Ensarylaryň ähli taýpasynda-da haýyr bardyr” diýdi."
