"Huzeýfeden (Allah ondan razy bolsun) rowaýat edilmegine görä, ol şeýle diýipdir: “(Bir gün) Omar (Allah ondan razy bolsun): “Pygamberimiz sallallahu aleýhi wesellemiň pitne hakynda aýdan sözleri kimiň ýadyna düşýär?” diýip sorady. Men şonda: “Onuň hemme aýdan zatlary, edil aýdyşy ýaly meniň ýadyma düşýär” diýdim. Omar: “Sen bu babatda (gaty) batyrgaýlyk görkezýärsiň, howa, nähili?” diýip sorady. Men: “Adamyň maşgalasy, çagalary we goňşulary sebäpli başyna gelen pitnelerini, namaz okamak, sadaka bermek we ýagşylyk etmek (ýaly sogap işler) arkaly aýrylyp, ýuwulýandyr.” diýdim. (Hadysy rowaýat eden Suleýman: “Namaz okamak, sadaka bermek we emri-magruf we nehi-müňker (adamlary ýagşylyga ündäp, ýamanlykdan gaýtarmak ýaly sogap işler) diýip aýtdy, diýipdir.) Omar: “Men bu hakda soramadym, men deňziň tolkunlary ýaly tolkun atyp, möwç aljak pitneler hakda soradym” diýdi. Men oňa: “Eý, mu’minleriň emiri, ol pitnelerden saňa zyýan gelmez , çünki seniň bilen olaryň arasynda gulply bir gapy bardyr” diýdim. Omar: “Şol gapy döwülermi ýa açylarmy?” diýip sorady. Men oňa: “Ýok, döwüler” diýdim. Omar: “Eger şol gapy döwülse, hiç haçan ýapylmaz” diýdi. Men: “Howa” diýdim. Biz Huzeýfeden (şol gapynyň kimdigini?) soramaga çekinip, Mesruga sorap ber diýdik. Huzeýfe: “Ol gapy – Omar radyýallahy anhunyň özüdir” diýdi. (Biz Huzeýfeden): “Omar (seniň haýsy gapy hakynda gürrüň edýändigiňi) bilýärdimi?” diýip soradyk. (Huzeýfe): “Hawa, bilýärdi, edil daň atmazdan öň (ilki) gije boljagyny bilşi ýaly (ol muny gaty gowy) bilýärdi, (çünki) meniň oňa aýdan sözümde hiç bir ýalan-ýaşryk ýokdy” diýdi."