"Aişadan (Allah ondan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellem hiç haçan gutulyp bilmedik hassalygy döwründe: “Pygamberleriniň gabyrlaryny mesjid edinýän ýehudylara we hristiýanlara Allah nälet etsin!” diýdi.
Aişa şeýle diýdi: “Eger-de şeýle ýagdaý bolmadyk bolsady, onda ol açyk meýdanda jaýlanardy. Emma onuň gabyryny bir ybadat edilýän mesjide öwrülmeginden gorky bardy”.
Sufýan Et-Tammardan rowaýat edilmegine görä, ol Pygamberimiz sallallahu aleýhi wesellemiň guburynyň (düýäniň örküji ýaly) tümmek edilen ýagdaýyny görüpdir.
Hişam ibn ‘Urwa kakasyndan rowaýat edip şeýle diýipdir: “Welid ibn Abdulmelik halyf bolan döwründe (Pygamberimiz sallallahu aleýhi wesellemiň) jaýlanan jaýynyň bir diwary ýykyldy. Ony (täzeden) bina edip dikeltmäge başladylar. Şol wagt olara bir aýak göründi. Olar Pygamberimiz sallallahu aleýhi wesellemiň aýagydyr öýdüp, gorkdylar. Ony bilýän hiç kimi tapyp bilmediler. Ahyrynda ‘Urwa (ibn Zubeýr) olara: “Ýok, Allahdan ant içýärin, bu aýak Pygamberimiz sallallahu aleýhi wesellemiň aýagy däldir. Bu aýak Omar ibn Hattabyň (Allah ondan razy bolsun) aýagydyr” diýdi."
