"Ebu Bekriň gyzy Äsmäden (Allah ondan razy bolsun) rowaýat edilmegine görä, ol şeýle diýipdir: “(Bir gezek) Gün tutulan güni, men Pygamberimiz sallahu aleýhi wesellemiň aýaly Aişanyň ýanyna geldim. Şol wagt adamlar namaz okap durdular. Aişa hem dik durup namaz okap duran ekeni. Men ondan: “Adamlara näme bolýar?” diýip soradym. Aişa eli bilen asmana yşarat edip: “Subhanallah!” diýdi. Men “Bu bir alamatmy?” diýip soradym. Ol kellesini ýaýkap: “Hawa” diýdi. Soňra men hem namaza durdym. (Birden) huşumy ýitirip, özümden gitjek boldum we kelläme suw akdyryp başladym. Namazdan soň, Pygamberimiz sallallahu aleýhi wesellem Allah Azza we Jellä hamdu-senalar aýdyp, soňundan şeýle diýdi: “Men (ýaňyja) şu duran ýerimde öň hiç haçan görmedik zatlarymy gördüm. Hatda, Jennet bilen dowzaham gördüm. Şeýle hem gabyrlaryňyzda dejjalyň synagyna meňzeş ýa-da şoňa golaýrak bir synag bilen synag ediljekdigiňiz maňa wahy edilip habar berildi. Siziň içiňizden (ölen) bir adamy getirip: “Bu adam, (ýagny Muhammed) hakda näme bilýärsiň?” diýip sorarlar. Imanly ýa-da (ynanjy bar bolan) adam: “Bu Allahyň ilçisi Muhammetdir. Ol bize anyk subutnamalar bilen we hidaýat, (ýagny dogry ýol görkezmek üçin) geldi. Biz Oňa jogap edip, Oňa iman etdik we (onuň ýolundan ýöräp), yzyna eýerdik” diýer. Soňra (perişdeler) oňa: “Indi, sen arkaýyn dynjyňy al-da ýatyber, çünki biz seniň Oňa çyn ýürekden ynanýandygyňa göz ýetirdik!” diýerler. Munafyk ýa-da (şübhelenip ýören adam) bolsa: “Men bilmedim, men diňe adamlaryň Onuň hakynda aýdanlaryny eşitdim we menem şolaryň diýen zadyny gaýtaladym” diýip jogap berer. "