"Ebu Hureýreden (Allah ondan razy bolsun) rowaýat edilmegine görä, ol şeýle diýipdir: “Bir gezek Resulullah sallallahu aleýhi wesellem mesjide girdi. Şol wagt başga biri-de mesjide girip namaz okady. Soňra gelip Pygamberimiz sallallahu aleýhi weselleme salam berdi. Pygamberimiz sallallahu aleýhi wesellem onuň salamyny alandan soň: “Yzyňa git-de, namazyňy täzeden oka. Çünki sen namaz okamadyň” diýdi. Ol adam yzyna dolanyp, öňküsi ýaly gaýtadan namaz okady. Soňra Pygamberimiz sallallahu aleýhi wesellemiň ýanyna gelip, ýene salam berdi. Pygamberimiz sallallahu aleýhi wesellem ýene-de: “Yzyňa git-de, namazyňy gaýtadan oka. Çünki sen namaz okamadyň” diýdi. Bu ýagdaý şeýdip, üç gezek gaýtalandy. Iň soňunda ol adam: “Seni hak bilen iberenden kasam edýärin, mundan başga hili namaz okalyşyny bilmeýärin. Maňa dogrusyny öwret!” diýdi.
Pygamberimiz sallallahu aleýhi wesellem oňa şeýle diýdi: “Namaz okamaga duranyňda ilki “Allahu Akbär” diýip, tekbir al. Soňra Kuranyň aýatlaryndan ýat tutanlaryňdan özüňe iň aňsat düşýänini oka. Soňra rukuga gidip, tä, beden agzalaryň ýerli-ýerine barýança dur. Soňra başyňy galdyryp, aýak üstünde doly dikelýänçäň dur. Soňra sejdä gidip, beden agzalaryň ýerli-ýerine barýança sejde-de dur. Soňra sejdeden başyňy galdyryp, beden agzalaryň barmaly ýerine barýança, dur. Tutuş namazyňda şeýle et” diýdi.
"
Jäbir ibn Semuradan (Allah ondan razy bolsun) rowaýat edilmegine görä, Sa’d ibn Ebu Wakkas şeýle diýipdir: “Men olara edil Pygamberimiz sallallahu aleýhi wesellemiň namaz okaýşy ýaly namaz okap bererdim. Ondan hiç bir zady kemeltmezdim. Öýle bilen ýassy namazlaryny okanymda, ilkinji iki rekagatyny uzagrak okardym, soňky iki rekagatyny bolsa, ýeňilräk (gysga) okardym” diýdi. Omar (Allah ondan razy bolsun): “Sen hakda çak edişimiz hem şeýledi!” diýdi.
"Ebu Katadadan (Allah ondan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellem öýle namazynyň ilkinji iki rekagatynda “Fatiha” süresi bilen ýene bir süre okardy. Birinji rekagatda uzyn, ikinji rekagatynda bolsa gysga süre okardy. Içinden okan aýatlaryny käwagtlar bize eşitdirip okardy.
Ikindi namazynyň ilkinji iki rekagatynda “Fatiha” bilen ýene bir süre okardy. Birinji rekagatda uzyn, ikinjisinde bolsa gysga süre okardy. Ertir namazynyň birinji rekagatyny uzaldyp, ikinjisini gysgaldardy”.
"
Ebu Ma’mardan rowaýat edilmegine görä, ol şeýle diýipdir: “(Bir gezek) biz Habbab ibn Aratdan (Allah ondan razy bolsun): “Allahyň Resuly sallallahu aleýhi wesellem öýle we ikindi namazlarynda Kuran okaýardymy?” diýip soradyk. Ol “Hawa” diýip jogap berdi. Biz ondan: “Siz ony nädip bilýärdiňiz?” diýip soradyk. Ol: “Sakgalynyň gymyldap durşundan” diýip jogap berdi”.
Ebu Ma’mardan rowaýat edilmegine görä, ol şeýle diýipdir: “(Bir gezek) men Habbab ibn Aratdan (Allah ondan razy bolsun): “Allahyň Resuly sallallahu aleýhi wesellem öýle we ikindi namazlarynda Kuran okaýardymy?” diýip soradym. Ol “Hawa” diýip jogap berdi. Men ondan: “Siz onuň Kuran okaýandygyny nädip bilýärdiňiz?” diýip soradyk. Ol: “Sakgalynyň gymyldap durşundan” diýip jogap berdi”.
Abdulla ibn Ebu Katadadan rowaýat edilmegine görä, onuň kakasy (Ebu Katada Allah ondan razy bolsun) şeýle diýipdir: “Pygamberimiz sallallahu aleýhi wesellem öýle we ikindi namazlarynyň ilkinji iki rekagatynda “Fatiha” süresini we ýene-de bir süreden goşup okardy. Käwagtlar bolsa içinden okaýan aýatlaryny bize eşitdirip okardy”.
Abdulla ibn Abbasdan (Allah ondan razy bolsun) rowaýat edilmegine görä, ol şeýle diýipdir: “(Bir gezek) ejem Ummul-Fadl meniň “Wäl-mursäläti ‘urfän” {Al-Mursalat:1} süresini okandygymy eşidip, ol maňa: “Eý, Oguljygym! Allahdan ant içýärin, bu süräni okamak bilen, sen maňa Resulullah sallallahu aleýhi wesellemiň agşam namazynda iň soňky okan süresini eşidendigimi ýatlatdyň” diýipdir”.
Merwan ibn Hakamdan rowaýat edilmegine görä, ol şeýle diýipdir: “(Bir gün) Zeýd ibn Säbit (Allah ondan razy bolsun) maňa şeýle diýdi: “Sen näme üçin hemişe agşam namazynda gysga sürelden okaýarsyň? Men Pygamberimiz sallallahu aleýhi wesellemiň agşam namazynda iň uzyn iki süräniň uzynyny okandygyny eşitdim” diýipdir”.
• Iki uzyn süre hakynda alymlaryň arasynda dürli pikirler bardyr. Iň meşhur we dogrusy iki uzyn süreden maksat “Angam” we “Agraf” süreleri diýipdirler. Bularyň iň uzyny Agrafdyr.
Muhammed ibn Jubeýr ibn Mut’ymden rowaýat edilmegine görä, onuň kakasy (Jubeýr ibn Mut’ym) şeýle diýipdir: “Men Pygamberimiz sallallahu aleýhi wesellemiň agşam namazynda “Tur” süresini okandygyny eşitdim” diýipdir”.
Ebu Rafi’dan rowaýat edilmegine görä, ol şeýle diýipdir: “Bir gezek men Ebu Hureýre bilen ýassy namazyny okadym. Ol şonda: “Izäs-sämäuň-şakkat” süresini okap, sejde edilýän ýerinde sejdä gitdi. Men ondan bu hakda soranymda, ol: “Men bu sejdäni Ebul-Kasym sallallahu aleýhi wesellemiň arkasynda edipdim. Men tä, Oňa duşýançam bu süre okalan wagtynda mydama sejde ederin” diýdi.
