‘Amr ibn Meýmun şeýle diýipdir: “Men (bir gezek) Suleýman ibn Ýasardan jenabatyň (hapalary) degen eşik hakynda soradym. Ol hem (maňa) Aişa şeýle diýip aýtdy diýdi: “(Adatça) Resulullah sallallahu aleýhi wesellemiň eşiklerinden ony men ýuwup aýyrardym. Ol hem ýuwlan ýeri çyg bolup dursa-da, (şol durşuna) namaza çykyp giderdi”.
Aişadan (Allah ondan razy bolsun) rowaýat edilmegine görä, “Resulullah sallallahu aleýhi wesellemiň eşiklerine meni degen wagty, ony (Aişa) ýuwar eken. Soňra ol (Resulullah sallallahu aleýhi wesellemiň) eşiklerinde galan bir ýa-da birnäçe çygly tegmilleriň yzlaryny görer eken”.
"Enesden (Allah ondan razy bolsun) rowaýat edilmegine görä, ol şeýle diýipdir: “(Bir wagtlar) ‘Ukl (ýa-da ‘Uraýna) taýpasyndan bolan adamlar Medinä geldiler.
(Ýarawsyzlyklary sebäpli, Medinäniň) howasy (olara ýakmady we olar) özlerini oňaýsyz duýdylar. Pygamberimiz sallallahu aleýhi wesellem olara (birnäçe wagtlap) süýtli düýeleriň saklanýan ýerine baryp, düýeleriň peşewinden we süýdünden içmeklerini emr etdi. Olar (aýdylan ýere) bardylar, haçan-da olar (kesellerinden) gutulyp, düzelensoňlar, Pygamberimiz sallallahu aleýhi wesellemiň çopanyny öldürip, onuň mallaryny bolsa sürüp, özleri bilen alyp gitdiler. Bu habar (Medinä) gündiz ir bilen gelip ýetdi. (Pygamberimiz sallallahu aleýhi wesellem) olaryň yzyndan (bir goşun) ugratdy. Eýýäm günortana çenli olary (Medinä) getirdiler. (Pygamberimiz sallallahu aleýhi wesellem) olaryň ellerini we aýaklaryny kesmegi emr etdi. (Üstesine-de, gyzgyn demir bilen) olaryň gözleri oýuldy. Soňra olary Harra (diýilýän ýere) taşladylar. Olar içmäge suw soradylar, ýöne hiç kim olara suw bermedi”.
(Bu hadysy Enesden rowaýat eden) Ebu Kylaba şeýle diýdi: “Bular ogurlyk eden, (adam) öldüren we iman edenlerinden soň, kapyr bolan hem-de Allaha we Onuň Resulyna garşy söweşen adamlardy”.
"
Enesden (Allah ondan razy bolsun) rowaýat edilmegine görä, ol şeýle diýipdir: “Mesjid gurulmazdan ozal, Pygamberimiz sallallahu aleýhi wesellem goýun ýataklarynda namaz okardy”.
Abdulla ibn Abbasyň (Allah ondan razy bolsun) Meýmunadan rowaýat etmegine görä, ol şeýle diýipdir: “(Bir gezek) Pygamberimiz sallallahu aleýhi wesellemden doňan ýagyň içine gaçan syçan hakda soradylar. Şonda Ol “Syçany we daş-töweregindäki (ýaglary) aýryp taşlaň-da, (galan) ýagyňyzy iýiň!” diýdi.
Abdulla ibn Abbasyň (Allah olardan razy bolsun) Meýmunadan rowaýat etmegine görä, ol şeýle diýipdir: “Pygamberimiz sallallahu aleýhi wesellemden doňan ýagyň içine gaçan syçan hakynda soranlarynda, Ol “Syçany we daş-töweregindäki (ýaglary) aýryp taşlaýyň!” diýdi.
Ebu Hureýreden (Allah ondan razy bolsun) rowaýat edilmegine görä, Pygamberimiz sallallahu aleýhi wesellem şeýle diýipdir: “Musulmanyň Allah ýolunda ýaralanan her bir ýarasy, Kyýamat gününde, ýara düşen wagtyndaky ýaly bolup, ondan paglap gan akar. Reňki ganyň reňkinde, ýöne ysy miskiň ysy ýaly (hoşboý ysly) bolar”.
Ebu Hureýreden (Allah ondan razy bolsun) rowaýat edilmegine görä, ol “Men Pygamberimiz sallallahu aleýhi wesellemiň “Biz iň soňky, (ýöne Kyýamat güni biz) ilkinji bolarys” diýenini eşitdim” diýipdir
Ýene-de Ebu Hureýreden (Allah ondan razy bolsun) rowaýat edilmegine görä, Pygamberimiz sallallahu aleýhi wesellem şeýle diýipdir: “Siziň hiç biriňiz akmaýan ýata suwa peşew etmesin! Çünki, soň şol suw ýuwunmak üçin gerek (bolmagy mümkindir)”.
"Abdulla ibn Mes’uddan (Allah ondan razy bolsun) rowaýat edilmegine görä, ol şeýle diýipdir: “(Bir gün) Pygamberimiz sallallahu aleýhi wesellem Käbäniň ýanynda namaz okap durdy. Ebu Jehl we onuň ýoldaşlary (oňa golaýrak bir ýerde) otyrdylar. Olaryň içinde biri beýlekilerine “Haýsy biriňiz pylan taýpanyň öldüren düýesiniň iç-goşlaryny (ýatgysyny) getirip, sejdä giden wagty, ony Muhammediň arkasynda goýup bilersiňiz?!” diýdi.
(Abdulla ibn Mas’ud Allah ondan razy bolsun şeýle diýdi): “Olaryň içindäki iň betbagt adam gidip, içegeleri getirdi, soň bolsa pursada garaşyp durdy. Haçan-da, Pygamberimiz sallallahu aleýhi wesellem sejdä giden wagty, ony arkasynda, iki pilçesiniň (omuznyň) arasynda goýdy. Men bolsam oňa (çäresiz) hiç zat edip bilmän, seredip durdum. Käşgä, meniň hem arkamda (dag ýaly) durup biljek adamlar bar bolsady”.
(Abdulla ibn Mas’ud Allah ondan razy bolsun şeýle diýdi): “Soňra olar biri-birleriniň (üstüne ýykylyp), barmaklaryny uzadyp, (Onuň üstünden) gülüp başladylar. Resulullah sallallahu aleýhi wesellem bolsa tä Fatyma gelýänçä, başyny sejdeden ýokary galdyryp bilmän durdy. Fatima gelip onuň üstünden içegeleri aýryp taşlady. Soňra Resulullah sallallahu aleýhi wesellem başyny galdyryp: “Allahym! Kuraýşlary Saňa tabşyrýaryn!” diýip, üç gezek gaýtalady. Pygamberimiz sallallahu aleýhi wesellemiň eden bed dogasy olara agyr degdi”.
(Abdulla ibn Mas’ud Allah ondan razy bolsun şeýle diýdi): “Çünki olar bu şäherde (bed) dogalaryň kabul boljagyna ynanýardylar. Soňra ýeke-ýeke atlaryny tutup: “Allahym! Ebu Jähli saňa tabşyrýaryn! ‘Utba ibn Rabi’any, Şeýbe ibn Rabi’any, El-Welid ibn ‘Utbany, Umeýýe ibn Halafy we ‘Ukba ibn Ebu Mu’yty Saňa tabşyrýaryn!” diýip, (olara bed) doga etdi.
Pygamberimiz sallallahu aleýhi wesellem ýedi sany adamyň adyny tutdy, ýöne bu hadysy rowaýat eden adam ýedinjiniň adyny ýatda saklap bilmändir.
(Abdulla ibn Mas’ud Allah ondan razy bolsun ýene-de şeýle diýdi): “Janym Elinde bolan Allahdan ant içýärin, Resulullah sallallahu aleýhi wesellemiň atlaryny tutup, bet doga eden adamlarynyň hemmesini (bir ýerde) – Bedr guýularynyň biriniň içinde jansyz ýagdaýda (taşlanandyklaryny) gördüm!”
"
