Enes ibn Mälikden (Allah ondan razy bolsun) rowaýat edilmegine görä, Pygamberimiz sallallahu aleýhi wesellem şeýle diýipdir: “Mekge we Medineden başga dejjalyň aýak basmadyk ýeri-ýurdy galmaz. Bu iki şäheri (Mekge we Medinäni) perişdeler hatara durup, oňa barýan ähli ýollary gorarlar. Soňra Medine, içindäki ähli ýaşaýjylary bilen bilelikde üç gezek titrär. Allah şol ýerden her bir kapyry we munafygy daşyna çykarar”.
"Ebu Sa’yd El-Hudrydan (Allah ondan razy bolsun) rowaýat edilmegine görä, ol şeýle diýipdir: (Bir gezek) Resulullah sallallahu aleýhi wesellem bize dejjal hakda uzak wagtlap gürrüň berdi. Şol aýdan zatlarynyň içinde, şular hem bardy: “Dejjal geler, ýöne oňa Medinä girmek gadagan edilendir. Şonda ol Medinäniň töweregindäki şor basyp giden bir ýerde bolar. Şol gün Medinäniň iň gowy adamsy (ýa-da iň haýyrly adamlaryndan biri) onuň garşysyna çykyp:
“Men seniň Resulullah sallallahu aleýhi wesellemiň hadyslarynda bize habar beren dejjalydygyňa şaýatlyk edýärin!” diýer. Şonda dejjal (töweregindäki adamlara ýüzlenip): “Eger men bu adamy öldürip, täzeden direltsem, meniň bu işimde (ýagny hudaýdygyma) şübhelenersiňizmi?” diýip sorar. Olar: “Ýok” diýip jogap bererler. Ol ony öldürip täzeden direlder.
Direlden badyna ol adam: “Wallahy, meniň (seniň dejjaldygyňa ) bolan ynamym hiç haçan şu günki ýaly güýçli bolmandy!” diýer. Şonda dejjal ýanyndakylara: “Men ony ýene öldürmek isleýärin, ýöne indi edip bilmeýärin!” diýer."
Jäbirden (Allah ondan razy bolsun) rowaýat edilmegine görä, ol şeýle diýipdir: “(Bir gün) bir beduin Pygamberimiz sallallahu aleýhi wesellemiň ýanyna gelip, (Yslama wepaly boljakdygyna ant içip) beýgat etdi. Ertesi gün gyzzyrma keseli bilen kesellän bu adam ýene gelip: “Meniň eden beýgatymy poz!” diýdi. Pygamberimiz sallallahu aleýhi wesellem (bu teklibi kabul etmekden) üç gezek ýüz öwürdi we soňundan şeýle diýdi: “Medine demirçiniň körügi ýaly kirlisini, erbedini daşyna zyňar, gowy arassa bolany bolsa (şöhle saçyp) aýdyň bolup galar”.
"Zeýd ibn Säbitden (Allah ondan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellem Uhud söweşine çykanda, käbir sahabalary (uruşman) yzlaryna gaýdyp geldiler. Şonda käbir sahabalar: “Geliň, bu (gaýdyp gelenleri) öldüreliň!” diýdiler. Ýene bir topar bolsa: “Ýok, olary öldürmäliň!” diýdiler. Soňra şu aýat indi: “Näme üçin siz munafyk ikiýüzlüler barada iki topara bölünýärsiňiz?” {Nisa:88}.
Pygamberimiz sallallahu aleýhi wesellem şonda: “Medine (erbet) adamlary, edil oduň demiriň hapasyny aýryp çykaryşy ýaly, kowup daşary çykarar” diýdi."
Enes ibn Mälikden (Allah ondan razy bolsun) rowaýat edilmegine görä, Pygamberimiz sallallahu aleýhi wesellem: “Allahym! Medinä, Mekgä beren bereketiňden iki esse artyk bereket ber!” diýip doga etdi.
Enes ibn Mälikden (Allah ondan razy bolsun) rowaýat edilmegine görä, Pygamberimiz sallallahu aleýhi wesellem sapardan gelen wagty, Medinäniň diwarlaryny görüp, düýesini çapdyryp gaýdardy. Egerde, (düýeden) başga bir ulagyň üstünde bolsa, onda Medinä bolan söýgüsinden ýaňa, ony çaltrak kowup getirerdi.
Enesden (Allah ondan razy bolsun) rowaýat edilmegine görä, ol şeýle diýipdir: “(Bir wagtlar) Benu Selime taýpasy öz öýlerinden, Pygamberimiz sallallahu aleýhi wesellemiň mesjidine golaýrak bir ýere göçüp gelmekçi boldular. Ýöne Pygamberimiz sallallahu aleýhi wesellem Medinäniň çet taraplarynyň boş galmagyny islemedi we olara: “Eý, Benu Selime ogullary! Siz, näme, (mesjide gelmek üçin) äden ädimleriňiziň sogabyny hasaba almaýarsyňyzmy?” diýdi. Şondan soň olar öňki ýerlerinde galdylar.
Ebu Hureýreden (Allah ondan razy bolsun) rowaýat edilmegine görä, Pygamberimiz sallallahu aleýhi wesellem şeýle diýdi: “Meniň öýüm bilen münberimiň arasy Jennetiň bakjalaryndan bir bakjadyr we meniň münberim howuzymyň üstündedir”.
"Aişadan (Allah ondan razy bolsun) rowaýat edilmegine görä, ol şeýle diýdi: “Resulullah sallallahu aleýhi wesellem Medinä (hijret edip) gelensoň, Ebu Bekr we Bilal gyzzyrma keseline duçar boldylar. Ebu Bekr gyzzyrmadan ejir çekip başlanda şu goşgyny aýdardy:
Her adama öz maşgalasynyň içinde ertiriniň haýyrly bolmagyny arzuw ederler,
Emma welin, ölüm oňa aýakgabynyň bagjygyndan hem ýakyndyr!
Bilal bolsa, gyzzyrmadan açylandan soň belent sesi bilen gygyryp şu goşgyny okardy:
Käşgä, birje gijäni geçirip biljekdigimi bilsedim
jülgedäki hoşboý ysly izhir we jelil ösümlikleriň arasynda?
Bir gün menem Majannadäki suwuň başyna bararmykam?
Şama we Tafil (daglary) maňa görünermikä?
Ýene Bilal: “Allahym! Şeýbe ibn Rabi‘a, ‘Utba ibn Rabi‘a we Umeýýe ibn Halafa nälet et! Çünki, şolar bizi ýurdumyzdan çykyp, gyrgyn keseliniň ýaýran ýerine gelmäge mejbur etdiler!” diýip, bet doga ederdi.
Soňra Pygamberimiz sallallahu aleýhi wesellem: “Allahym! Bize Medinäni Mekgäni söýşümiz ýaly ýa-da ondan hem beter söýdür! “Allahym! Biziň sa‘ we mudd ýaly ölçeglerimizde bereket yhsan eýle! Howasyny biziň saglygymyz üçin melhem eýle we onuň gyzzyrma keselini (Medineden aýyryp) Juhfa alyp git!” diýip doga etdi.
Aişa şeýle diýdi: “Biz Medinä gelenimizde, Medine Allahyň iň gyrgyn keseli ýaýran ýerleriniň biridi.
Aişa ýene-de: “Medinäniň Buthan (jülgesinden) reňkini üýtgeden zaýa suwlar akardy” diýerdi."
” •Majanna – Mekgä golaý bir ýeriň ady.
• Bilal şu goşgy bilen Mekgäni küýseýändigini beýan edipdir.
• Pygamberimiz sallallahu aleýhi wesellemiň Mekgedäki ganym duşmanlarynyň atlary.”
Zeýd ibn Eslem öz kakasyndan rowaýat etmegine görä, Omar (Allah ondan razy bolsun): “Allahym! Maňa ýoluňda şehid bolmagy miýesser eýle we meniň ölümimi Resulyň Muhammed sallallahu aleýhi wesellemiň ýurdunda eýläweri!” diýip doga ederdi.
