"Enes ibn Mälikden rowaýat edilmegine görä, Ebu Zerr (Allah ondan razy bolsun) gürrüň beripdir. (Ýagny) Pygamberimiz sallallahu aleýhi wesellem şeýle diýipdir: “Mekgede bolan wagtym, (bir gün) öýümiň üçegi açyldy we ýokardan Jebraýyl (aleýhissalam) indi, gursagymy ýaryp, soňra ony Zemzem suwy bilen ýuwdy. Soňra altyndan ýasalan içi iman bilen paýhasdan doldurylan bir legen getirip, ony meniň gursagyma guýdy we soňra gursagymy ýapdy. Soňra elimden tutup, meni Dünýäniň asmanyna, ýokaryk çykardy. Haçan-da, biz Dünýäniň asmanyna ýetenimizde, Jebraýyl aleýhissalam asmanyň sakçysyna “Aç!” diýdi. Ol “Kim bu?” diýip sorady. “Bu – men Jebraýyl” diýdi. Ol ýene-de “Ýanyňda biri barmy?” diýdi. Jebraýyl (aleýhissalam) “Hawa, ýanymda Muhammed sallallahu aleýhi wesellem bar” diýdi. Ol ýene-de “Onuň yzyndan (gelsin diýip) habar iberdilermi?” diýdi. Jebraýyl “Hawa” diýdi. Ol (derwezäni) açandan soň, biz Dünýäniň asmanynyň üstüne çykdyk. Biz ol ýerde oturan bir adamy gördük. Ol adamyň sagynda bir gara tümlük, çepinde-de bir gara tümlük bardy. Ol adam sag tarapyna sereden wagty gülýärdi, çep tarapyna seredende bolsa aglaýardy. (Ol adam meni görende) “Hoş geldiň, salyh pygamber we salyh perzent!” diýdi. Men Jebraýyldan “Bu kim?” diýip soradym. Ol “Bu – Adam (ata), sagyndaky we çepindäki gara tümlükler bolsa, onuň zürýatlarynyň ruhlarydyr” diýdi. “Sagyndakylar Jennetiler, çepindäki gara tümlükler bolsa dowzaha girjeklerdir. Şonuň üçin hem sagyna seredende gülýär, çepine seredende bolsa aglaýar” diýdi. (Soňra Jebraýyl) meniň bilen ikinji (gat) asmana çykdy we onuň sakçysyna “Aç!” diýdi. Bu sakçy hem oňa owalky (sakçynyň) aýdan soraglary ýaly soraglary berip, soňra (derwezäni) açdy. Enes şeýle diýdi: “Ebu Zerr (Pygamberimiz sallallahu aleýhi wesellem) asmanda Adamy, Idrisi, Musany, Isany we Ybrahymy (Allahyň salat we salamy olara bolsun) görenem bolsa, olaryň anyk menzilleriniň nirededigini, (ýagny haýsy gatdadygyny) aýtmandyr, ýöne diňe Adam (ata) Dünýäniň asmanynyň (birinji gatynda) we Ybrahym (pygambere-de) asmanyň altynjy (gatynda) duşup görüşendigini aýtdy”. Ýene-de Enes şeýle diýdi: “Haçan-da, Jebraýyl (aleýhissalam) Pygamberimiz sallallahu aleýhi wesellem bilen Idrisiň ýanyndan geçip barýarkalar, (Idris) oňa: “Hoş geldiň salyh pygamber we salyh dogan!” diýipdir. (Pygamberimiz sallallahu aleýhi wesellem) – men “Bu kim?” diýdim. Jebraýyl (aleýhissalam) “Bu – Idris” diýdi. Soňra Musanyň ýanyndan geçdim. Ol maňa “Hoş geldiň salyh dogan we salyh pygamber!” diýdi. Men “Bu kim?” diýdim. Ol “Bu – Musa” diýdi. Soňra Isanyň ýanyndan geçdim. Ol maňa “Hoş geldiň salyh dogan we salyh pygamber!” diýdi. Men “Bu kim?” diýdim. Ol “Bu – Isa” diýdi. Soňra Ybrahymyň ýanyndan geçdim. Ol hem maňa “Hoş geldiň salyh pygamber we salyh ogul!” diýdi. Men “Bu kim?” diýdim. Ol “Bu – Ybrahym (sallallahu aleýhi wesellemdir)” diýdi. Ibni Şihäb şeýle diýipdir: “Ibnu Hazmyň habar bermegine görä, Ibn Abbasyň we Ebu Habbatul Ensarynyň (Allah olardan razy bolsun) rowaýat etmeklerine görä, Pygamberimiz sallallahu aleýhi wesellem şeýle diýipdir: “Soňra Jebraýyl (aleýhissalam) meni alyp, şeýle bir beýiklige çykardy welin, men hatda şol ýerde galamlaryň (ýazýan) seslerine çenli eşitdim”. Ýene-de Ibn Hazimiň we Enes ibn Mäligiň habar bermeklerine görä, Pygamberimiz sallallahu aleýhi wesellem şeýle diýipdir: “Allah meniň ymmatyma (her gün) elli (gezek) namaz okamagy parz etdi. Men bu buýruk bilen gaýdyp gelýärkäm, Musanyň ýanyndan geçdim. Ol menden “Allah ymmatyňa näme parz etdi?” diýip sorady. Men “(Her gün) elli namaz okamagy buýurdy” diýdim. (Musa) maňa “Yzyňa (dolan-da), Robbuň ýanyna bar, çünki seniň ymmatyň muňa güýji ýetmez?” diýdi. Men yzyma öwrülip, Allaha ýüz tutdum. Allah namazyň ýaryny aýyrdy. Soň Musanyň ýanyna gaýdyp geldim we oňa: “Ýaryny aýyrdy” diýdim. Ol “Robbuňa ýüz tut , çünki seniň ymmatyň muňa-da güýji ýetmez?” diýdi. Men ýene-de Allaha ýüz tutdym. Allah ýene-de ýaryny aýyrdy. Men ýene-de Musanyň ýanyna geldim. Ol ýene-de maňa “Robbuň ýanyna bar, çünki seniň ymmatyň muňa-da güýji ýetmez?” diýdi. Men ýene-de Allaha ýüz tutdym. Allaha Tagala şonda “Ol bäşdir we (şol bir wagtyň özünde) ellidir . Meniň sözüm üýtgeýän däldir!” diýdi. Men şondan soň, Musanyň ýanyna gaýdyp geldim, ol maňa ýene-de gaýtalap: “Robbuňa ýüz tut!” diýdi. Men oňa “Men indi Robbumdan utanýaryn!” diýdim. Soňra Jebraýyl (aleýhissalam) meni has aňryk – “Sidretul-Muntehaň” ýanyna alyp gitdi. Ol ýerler şeýle bir reňkler bilen gurşalypdyr welin, ony taryp etmek mümkin däldi. Soň meni Jennete saldylar. Ol ýerde (bir giden) merjen monjuklary bardy we onuň topragy hem miskdendi. "