"Ebu Hureýreden (Allah ondan razy bolsun) habar berilmegine görä, ol şeýle diýipdir: “(Bir gezek) biz Pygamberimiz sallallahu aleýhi wesellemiň ýanynda otyrkak bir adam onuň ýanyna gelip: “Ýa Resulallah, men heläk boldum!” diýdi. Pygamberimiz sallallahu aleýhi wesellem: “Saňa näme boldy?” diýip sorady. Ol adam: “Agzym bekli wagty aýalyma ýanaşdym” diýdi. Resulullah sallallahu aleýhi wesellem: “Azat eder ýaly bir gul tapyp bilersiňmi?” diýdi. Ol: “Ýok” diýdi. Pygamberimiz sallallahu aleýhi wesellem ýene: “Iki aý yzly-yzyna agyz bekläp bilersiňizmi?” diýip sorady. Ol ýene: “Ýok” diýdi. Pygamberimiz sallallahu aleýhi wesellem ýene-de: “Altmyş sany garyp-misgini naharlap bilersiňizmi? diýdi. Ol ýene-de: “Ýok” diýdi.
(Ebu Hureýre) şeýle diýdi: “(Şondan soň) Pygamberimiz sallallahu aleýhi wesellem birnäçe wagtlap garaşyp durdy. Biz hem onuň bilen şol ýagdaýda durkak, oňa bir sebet doly hurma getirdiler. Ol: “Ýaňky sorag beren adam nirede?” diýip sorady. Ol: “Men bäride” diýdi. Pygamberimiz sallallahu aleýhi wesellem: “Muny al-da, (garyplara) sadaka paýla!” diýdi. Ol adam: “Ýa Resulallah, muny menden has garyplara bereýinmi? Allahdan ant içýärin, Medine-de meniň maşgalamdan garyp maşgala ýok ahyryn!” diýdi.
Pygamberimiz sallallahu aleýhi wesellem (muny eşidip) dişleri görünýänçä güldi-de: “Bulary al-da, çagalaryňa iýdir!” diýdi."
