"Abdulla ibn Katadadan (Allah ondan razy bolsun), rowaýat edilmegine görä, onuň kakasy (Ebu Katada) gürrüň berip şeýle diýipdir: “Biz Pygamberimiz sallallahu aleýhi wesellem bilen (umra etmek üçin) ýola düşdük. Onuň sahabalary yhram bagladylar, ýöne men yhram baglamadym. Bize Gaýkada duşman bardygyny habar berdiler, biz hem olara tarap ugradyk. Ýolda ýoldaşlarym bir ýabany gulan görüp, biri-birlerine seredip gülüşmäge başladylar. Men töwerege göz aýladym we men hem ony gördüm. Ata münüp derrew onuň yzyndan kowaladym we ony urup sakladym. Soňra men ýoldaşlarymdan kömek soradym, ýöne olar maňa kömek etmekden ýüz öwürdiler (çünki olar yhramlydylar). Biziň hemmämiz onuň etinden iýdik. Soňra biz bölünip galmakdan gorkduk. Men Pygamberimiz sallallahu aleýhi wesellemiň yzyndan ýetmek üçin atymy käte çapdyryp, käte-de ýöredip gaýtdym. Gijäniň ýarynda Benu Gifar taýpasyndan bir adama duşdum we ondan: “Pygamberimiz sallallahu aleýhi wesellemi nirede goýup gaýtdyň?” diýip soradym. Ol hem: “Men onuň bilen Ta‘hinde aýrylypdym. Ol Sukýada günortanlyk ukusyny almak isleýärdi” diýdi. Ahyrynda Resulullah sallallahu aleýhi wesellemiň yzyndan ýetdim we oňa: “Ýa Resulallah! Sahabalaryň saňa salam we Allahyň rahmetini we bereketini ugratdylar. Duşmanlaryň olary senden aýyrmagyndan gorkýardylar, şonuň üçin hem olara garaşaý!” diýdim. Pygamberimiz sallallahu aleýhi wesellem hem olar gelýänçä garaşdy. Men ýene-de: “Ýa Resulallah! Biz ýabany bir eşek (gulan) awladyk we biziň ýanymyzda onuň etinden bir bölek et bar” diýdim. Resulallah sallallahu aleýhi wesellem ýanyndaky sahabalaryna: “Iýiň!” diýdi we şol wagt olaryň hemmesi yhramlydylar."