"Aişadan (Allah ondan razy bolsun) rowaýat edilmegine görä, ol şeýle diýipdir: “Biz (hoşlaşyk hajynda) Pygamberimiz sallallahu aleýhi wesellem bilen diňe haj etmek niýeti bilen (Medineden Mekgä tarap) ýola düşdük. Pygamberimiz sallallahu aleýhi wesellem (Mekgä) gelip, Käbäň daşyndan towaf edip, Safa-Merwäniň arasynda-da sa‘y etdi. Ýany bilen gurbanlyk malyny getirendigi üçin yhramdan çykmady. Ýanyndaky aýallary we sahabalary hem towaf etdiler. Ýanynda gurbanlyk malyny getirmedikler yhramdan çykdylar. Aişanyň aýbaşysy geldi. Biz hajyň ähli dessurlaryny ýerine ýetirdik. Haçanda, Hasba gijesi, (Mekgeden) çykyp gitmeli gije gelende, Aişa: “Ýa Resulallah! Sahabalaryň menden başga hemmesi haj we umra edip gaýdyp barýarlar, men bolsam diňe bir haj bilen gaýdyp barýaryn” diýdim. Pygamberimiz sallallahu aleýhi wesellem: “Mekgä gelen gijelerimiz towaf etmediňmi?” diýdi. Men: “Ýok” diýdim. Pygamberimiz sallallahu aleýhi wesellem: “Doganyň bilen Tan‘yma git-de, şol ýerden umra etmek üçin yhrama gir-de, telbiýe et. Soňra pylan, pylan ýerde duşuşarys” diýdi. Soňra men (erkek doganym) Abdurrahman bilen Tan‘yma gidip, şol ýerden umra etmek üçin yhram baglap, telbiýe etdim. Soňra Safiýýa bint Huýeýýiň aýbaşysy geldi. Pygamberimiz sallallahu aleýhi wesellem: “Wah seniň! Sen bizi ýolumyzdan saklaýmasaň! Sen näme gurbanlyk güni towaf etmediňmi näme?” diýdi. Ol: “Etdim” diýdi. Pygamberimiz sallallahu aleýhi wesellem: “(Onda) zyýany ýok, gidiber” diýdi. Aişa: “(Men umradan gaýdyp gelýärkäm), Pygamberimiz sallallahu aleýhi wesellem Mekgeden ýokaryk çykyp barýarka, men hem Mekgeden aşak düşüp barýarkam ýa-da men ýokaryk çykyp barýarkam, ol bolsa aşak düşüp barýarka, oňa duşdum” diýdi."