"Ebu Bekreden (Allah ondan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellem Gurbanlyk güni bize hutba okap: “Bu gün haýsy gün?” diýip sorady. Biz: “Allah we onuň Resuly has gowy bilýändir” diýdik. Pygamberimiz sallallahu aleýhi wesellem as salym dymyp durdy, biz bu günüň adyny, öz adyndan başga bir at berjekmikä, diýip pikir etdik. “Bu gün, Gurbanlyk güni dälmi näme?!” diýdi. Biz: “Hawa, Gurbanlyk güni” diýdik. “Bu haýsy aý?” diýip sorady. Biz: “Allah we onuň Resuly has gowy bilýändir” diýdik. Pygamberimiz sallallahu aleýhi wesellem az wagtlap dymyp durdy. Biz Ol bu aýyň adyna başga bir at berjekmikä öýdip, pikir etdik. “Bu aý Zul-Hijje aýy dälmi näme?!” diýdi. Biz: “Hawa” diýdik. “Bu haýsy şäher?” diýip sorady. Biz: “Allah we onuň Resuly has gowy bilýändir” diýdik. Soňra Pygamberimiz sallallahu aleýhi wesellem az salym dymyp durdy, biz bu şähere başga bir at berjekmikä, diýip pikir etdik. “Bu şäher Haram (Mekge) şäheri dälmi näme?!” diýdi. Biz: “Hawa” diýdik. Soňra Pygamberimiz sallallahu aleýhi wesellem şeýle diýdi: “Elbetde, siziň ganlaryňyz we mallaryňyz (emlägiňiz) tä, Robbuňyza gowuşýançaňyz, şu aýda, şu şäherde şu günüňiziň haram bolşy ýaly biri-biriňize haram edilendir. Üns beriň! Men (Allahyň amanadyny) size ýetirip bildimmi!” diýdi. Sahabalar: “Hawa!” diýdiler. Pygamberimiz sallallahu aleýhi wesellem: “Allahym şaýat bol!” diýdi. Soňra: “Bu ýerdäkiler bu ýerde bolmadyk adamlara meniň şu sözlerimi ýetirsin. Belki-de, (meniň şu sözlerimi ýetirilen) käbir adamlar, şu ýerde (gulaklary bilen) eşidenleriň birnäçesinden has gowy düşünerler. Menden soň kapyrlar ýaly bolup biri-birleriňiziň kelläňizi kesmäň!” diýdi."