"Alydan (Allah ondan razy bolsun) rowaýat edilmegine görä, ol şeýle diýipdir: “Bir gezek biz “Baki’ul-Garkad” gonamçylygynda bir jynazada-dyk. Pygamberimiz sallallahu aleýhi wesellem hem biziň ýanymyza gelip oturdy. Biz Onuň töweregine geçip oturdyk. Onuň elinde kiçijik bir taýajygy bardy. Başyny aşak egip, elindäki taýajygyny ýere urup başlady we soňra şeýle diýdi: “Siziň içiňizde Jennetde we dowzahda orny kesgitlenmedik hiç kimse ýokdur, şeýle hem her bir adamyň bagtly ýa-da bagtsyz boljagy hem ýazylyp goýulandyr”.
Şol wagt sahabalardan biri: “Ýa Resulallah! Onda biz amal (ybadat) etmegi taşlap, diňe ýazgydymyza bil baglamaly bolýarysmy? Kim biziň içimizden bagtlylardan bolsa, ol iň soňy bagtlylaryň amalyny edip (Jennete girer), bagtsyzlardan bolanam iň soňy bagtsyzlaryň edýän amalyny edip (dowzaha girer)” diýdi.
Pygamberimiz sallallahu aleýhi wesellem: “Bagtly adamlara bagtlylaryň amallaryny etmek ýeňilleşdiriler, bagtsyz adamlara-da bagtsyzlaryň amallary ýeňilleşdiriler” diýdi. Soňra şu aýaty okady: “Kim (öz emlägini Allahyň ýolunda) sarp etse, takwa bolsa (günälerden saklansa), we iň gowyny (Allanyň birligini) tassyklasa, Biz oňa iň aňsady (jenneti) miýesser ederis”. {Leýl:5-7} "
