Enes ibn Mälikden (Allah olardan razy bolsun) rowaýat edilmegine görä, ol şeýle diýipdir: “Pygamberimiz sallallahu aleýhi wesellemiň döwründe bir ýyl adamlar guraklyga duçar boldular. Juma günleriniň birinde Pygamberimiz sallallahu aleýhi wesellem hutba okap durka, çarwa araplaryň biri ýerinden turup: “Eý, Allahyň Resuly! Mallar heläk boldy, bala-çagalar hem aç galdy. Biziň üçin Allahdan bir doga edip ber!” diýdi. Pygamberimiz sallallahu aleýhi wesellem ellerini ýokary galdyrdy. Şol wagt asmanda ýekeje bulut hem ýokdy. Janym elinde bolan Allahdan ant içýärin, Pygamberimiz sallallahu aleýhi wesellem entek ellerini aşak düşürmäkä asmanda daglar ýaly bulutlar peýda bolup gök ýüzüni tutdy. Soňra heniz münberinden düşmänkä, Pygamberimiz sallallahu aleýhi wesellemiň sakgalyndan ýagyş damjalarynyň togalanyp damyp duruşyny gördüm . Şol gün (uzakly gün), ertesi güni, birigüni, ondan soňky güni, tä, indiki Juma gününe çenli ýagyş dynman ýagyp durdy. Indiki jumada ýene şol öňki çarwa arap ýa-da başga biri ýerinden turup: “Eý, Allahyň Resuly! Öýler ýykyldy, ähli zatlarymyz suwyň aşagynda galdy. Biziň üçin Allahdan bir doga edip ber!” diýdi. Pygamberimiz sallallahu aleýhi wesellem ýene ellerini ýokary galdyryp: “Allahym! Üstümize däl-de, töweregimize ýagdyr!” diýip doga etdi. Şondan soň, Ol eli bilen haýsy tarapdaky buluda yşarat etse, şol ýer açylardy we şeýlelikde, Medine töweregi ýapyk, üsti açyk bir meýdan ýaly bolup durdy. Kanat jülgesi bir aýlap dynman suwdan dolup akdy. Daş töwerekden gelen her bir adam, şol güýçi ýagyşyň gürrüňini ederdiler”.