"‘Ubeýdulla ibn Abdulla ibn ‘Utba ibn Mes’ud, Ibn Abbasdan rowaýat edip şeýle diýipdir: “Bir gezek Ibn Abbas Musa (aleýhissalamyň duşuşan adamy) – ýoldaşy hakynda Al-Hurr ibn Kaýs ibn Hisn El-Fazari bilen jedel edipdir. Şol wagt olaryň ýanyndan Ubeýý ibn Ka’b geçip barýan eken.
Ibn Abbas ony ýanyna çagyryp:
–Men bu dostum bilen Musa (aleýhissalamyň) duşuşmak üçin onuň ýoluny soran dosty hakynda jedel etdim. Sen Pygamberimiz sallallahu aleýhi wesellemden onuň hakynda bir zatlar aýdanyny eşitdiňmi? diýdi.
Ol:
–Hawa, men Pygamberimiz sallallahu aleýhi wesellemiň şeýle diýenini eşitdim, diýdi.
“Musa (aleýhissalam) Ysraýyl ogullaryndan bolan bir jemagatyň içinde otyrka, bir adam onuň ýanyna gelip: “Sendenem has köp bilýän (alym) birini tanaýarsyňmy? – diýip sorady.
Musa “Ýok (tanamok)” diýdi. Şol wagt Allah Tagala Musa (aleýhissalama) wahy edip: “Ýok, beýle däl. Biziň Hydyr diýen bir gulumyz bardyr!” diýdi.
Musa (aleýhissalam) onuň ýanyna barmak üçin ýol salgy bermegi sorady. Allah onuň üçin bir balygy alamat edip goýdy. (Allah tarapyndan) oňa “Balygy ýitiren badyňa yzyňa dolanyp gel, şonda sen onuň bilen duşuşyp bilersiň” diýildi.
Musa (aleýhissalam) deňizdäki balygyň yzyny yzarlap başlady. Soňra Musanyň ýanyndaky ýaş hyzmatkäri oňa şeýle diýdi:
“Gördüňmi, ýaňy daşyň ýanynda (dynç, alanymyzda) ol balygy ýatdan çykarypdyryn. Ony ýatlamagy maňa unutdyran şeýtandan başga hiç kim däldir.” {Kehf:63}. Musa:
“Ine, biziň gözleýän zadymyz hem şu-da” – diýdi. Soňra olar yzlaryna, gelen ýerlerine tarap öwrüldiler. {Kehf:64}.
Soňra olar Hydyr (aleýhissalamy) tapdylar. Şondan soň bolsa, Allah Azza we Jelläniň Öz kitabynda gürrüň beren zatlary, olaryň başyna geldi.” "
