"Ebu Hureýreden (Allah ondan razy bolsun) rowaýat edilmegine görä, ol şeýle diýipdir: “Bir gün Pygamberimiz sallallahu aleýhi wesellem adamlaryň arasyndady, onuň ýanyna Jebraýyl gelip:
–Iman näme? diýip sorady.
–Iman Allaha we Onuň perişdelerine we pygamberlerine, şeýle hem ölenden soň direljegiňe iman etmek, (ýagny ynanmakdyr), diýdi.
–Yslam näme?
–Yslam Allaha ybadat etmek we Oňa hiç zady şärik getirmezlik, namazy kämil berjaý etmek, parz edilen zekady bermek, Remezan aýynda agyz beklemekdir.
Ol “Yhsan näme?” diýip sorag berdi. Pygamberimiz sallallahu aleýhi wesellem “Yhsan Allahy görüp duran ýaly bolup ybadat etmekdir, çünki sen ony görmeseň hem Ol seni görýändir” diýip jogap berdi.
–Kyýamat haçan (gopar)?
–Bu hakda soralýan adam soraýandan köp bilýän däldir,( ýöne) saňa onuň alamatlary hakynda habar bereýin: Haçan-da, gyrnak aýal özüne hojaýyn boljak çagany (ýagny hojaýynyndan çaga) dogursa, şeýle hem, eger-de (hiç zatlary bolmadyk) gara düýe çopanlary beýik-beýik binalary gurmakda biri-birleri bilen ýaryşarlar, diýdi.
(Kyýamatyň haçan gopjaklygy) Allahdan başga hiç kimiň bilmeýän bäş zatlaryndan biridir”. Soňra Pygamberimiz sallallahu aleýhi wesellem şu aýaty okady: “Elbetde, Kyýamatyň (haçan gopjakdygy hakdaky) maglumat diňe Allahyň ýanyndadyr” {Lukman:34}.
Soňra ol (sorag beren adam) arkasyna öwrülip gitdi. Pygamberimiz sallallahu aleýhi wesellem “Ony yzyna getiriň!” diýdi, ýöne (sahabalar) ony tapmadylar.
Şonda Pygamberimiz sallallahu aleýhi wesellem “Ol Jebraýyldy, adamlara dinlerini öwretmek üçin geldi” diýdi.
Ebu Abdulla şeýle diýdi: “(Pygamberimiz sallallahu aleýhi wesellem) (ýokardaky agzalanlaryň) hemmesini imandan hasaplady”."
